ڈی آئی جی پی حیدرآباد رینج کا بدین کا دورہ۔

 ڈی آئی جی پی حیدرآباد رینج کا  بدین کا دورہ۔

 

  سیف سٹی پروجیکٹ ماتلی اور ماڈل پولیس اسٹیشن بدین  کے زیر تعمیر امور کا افتتاح کیا۔

 

 " اعتماد ھوم" بدین کا دورہ ، اور ضلع بھر کے امن و امان کی مجموعی صورتحال کے حوالے سے ایس ایس پی آفس بدین میں ایس ڈی پی اوز اور ایس ایچ اوز کے اجلاس کی صدارت کی۔

 

ڈپٹی انسپکٹر جنرل آف پولیس حیدرآباد رینج طارق رزاق دھاریجو  نے ماتلی میں شہریوں کے تعاون سے بنائے گئے سیف سٹی پروجیکٹ کا افتتاح کیا اس موقع ایس ایس پی بدین شیراز نظیر نے ڈی آئی جی پی حیدرآباد کو تفصیلی بریفنگ دی ڈی آئی جی پی حیدرآباد رینج نے کنٹرول روم کا معائنہ بھی کیا ڈی آئی جی پی حیدرآباد طارق رزاق دھاریجو نے سیف سٹی پروجیکٹ ماتلی کی افتتاحی تقریب کے دوران ماتلی کے شہریوں اور چیئرمین میونسپل کمیٹی حاجی رضوان احمد قائم خانی کی کاوشوں کو سراہا۔

 

ماتلی سیف سٹی پروجیکٹ کی افتتاحی تقریب سےخطاب کرتے ہوئے ڈی آئی جی پی حیدرآباد  نے کہا کہ  ماتلی کے شہری بہت پروگریسو ہیں جنہوں نے اپنی مدد آپ کے تحت سیف سٹی پروجیکٹ کی بنیاد رکھی انہوں نے مزید کہا کہ  سیف سٹی پروجیکٹ سے اسٹریٹ کرائم میں کمی آئے گی اور جرائم ہونے کے بعد سی سی ٹی وی فوٹیج کی مدد سے ملزمان کا پتا لگانے میں مدد حاصل ہوگی۔

 

 ڈی آئی جی پی حیدرآباد طارق رزاق دھاریجو نے کہا کہ  ماتلی میں امن وامان کے قیام اور شہریوں میں احساس تحفظ کی فراہمی کے لئے 6 موٹر سائیکلیں اور اضافی پولیس نفری فراہم کی جائے گی۔

 

بعد ازاں انہوں  نے ماڈل پولیس اسٹیشن بدین کے تزئین و آرائش کے کاموں  کا افتتاح کیا اور مختلف شعبہ جات کا معائنہ بھی کیا جبکہ ڈی آئی جی پی حیدرآباد طارق رزاق دھاریجو نے یتیم و بے سہارا بچوں کے لئے زیر تعمیر ادارے "اعتماد ھوم" کا دورہ بھی کیا۔

 

ڈی آئی جی پی حیدرآباد طارق رزاق دھاریجو نے ایس ایس پی آفیس بدین میں ضلع بھر کے ایس ڈی پی اوز اور ایس ایچ اوز کے اجلاس کی صدارت کی اور امن و امان کی مجموعی صورتحال کا جائزہ لیا۔