ڈی آئی جی ٹریفک پولیس کراچی کی زیرِ صدارت دفتر ہٰذا میں ای چالان سسٹم کے حوالے سے ایک اہم اجلاس منعقد ہوا۔ اجلاس میں ٹریفک کے تمام ایس ایس پی صاحبان اور CPLC کے نمائندگان نے شرکت کی۔

اجلاس کے دوران شہریوں کی جانب سے موصول ہونے والی ای چالان سے متعلق شکایات پر تفصیلی غور کیا گیا۔ اس ضمن میں تمام اضلاع میں ایس پی صاحبان اور CPLC ممبران پر مشتمل ایک مشترکہ کمیٹی تشکیل دی گئی ہے جو شہریوں کی شکایات کا تکنیکی و قانونی پہلوؤں سے جائزہ لے کر منصفانہ کارروائی کو یقینی بنائے گی۔

مزید برآں، اجلاس میں شہریوں کی سہولت کے لیے قائم کیے گئے جدید سہولت مراکز کے حوالے سے بریفنگ دی گئی۔ بتایا گیا کہ جدید ٹیکنالوجی کے استعمال سے نہ صرف چالان کے عمل کو شفاف بنایا جا رہا ہے بلکہ شہریوں کو بروقت معلومات کی فراہمی کے لیے سہولت مراکز کو بھی فعال کیا گیا ہے۔

اجلاس کے اختتام پر تمام افسران نے اس عزم کا اظہار کیا کہ شہریوں کی سہولت، ٹریفک نظام کی بہتری، اور قانون کی عملداری کے لیے تمام ممکنہ اقدامات جاری رکھے جائیں گے۔

آپ کے سفر میں ہمسفر — کراچی ٹریفک پولیس